Ака уйăхĕн 21-28 кунсенче районти шкулсенче Чăваш чĕлхи эрни иртет. Ăна чăваш халăхне çутта кăлараканне И.Я.Яковлева халалланă.

Шкулсенче тĕрлĕ мероприятисем йĕркелеççĕ. Кĕçĕн классенче вĕренекенсем И.Я.Яковлев хайлавĕсене вулаççĕ, вĕсене иллюстрацилеççĕ, инсцинировкăсем лартаççĕ. Вăтам классенче вĕренекенсем хăйсем тăван чĕлхене мĕнле пĕлнине тĕрĕслес тĕллевпе тĕрлĕ ăс-тăн ăмăртăвĕсенче, вăйă-конкурссенче, викторинăсенче хутшăнаççĕ. Аслă класра вĕренекннсем вара литературăпа музыка композицйĕсене йĕркелеççĕ, сочиненисемпе рефератсен конкурсĕсенче, вулавçăсен ăмăртăвĕсенче, вулавçăсен конференцийĕсенче активлă хутшăнаççĕ.

Ака уйăхĕн 26-мĕшĕнче районти шкулсенчи чăваш чĕлхипе литературине вĕрентекенсем Турай шкулĕнче пулса курчĕç. Ку шкула Иван Яковлев шкулĕ теççĕ. Хăй вăхăтăнче Турайра шкул уçасси пирки Иван Яковлевич чылай тăрăшнă, кунта килсе çÿренĕ. Шкул музейĕнче çакна çирĕплетекен архив докуменчĕсем упранаççĕ.

Вĕрентекнсем Турай шкулĕнчи педагогсен ĕçĕпе паллашрĕç, уçă уроксенче пулчĕç. Ачасем вĕрентекенсене уяв ячĕпе саламларĕç, юрă-ташăпа савăнтарчĕç.

Ака уйăхĕн 25-мĕшĕнче паллă тăвакан Чăваш чĕлхи куне халалланă мероприятисем республикăра та районта та тахçаннах пуçланнă ĕнтĕ. Районта ирттернĕ «Туслăх хĕлхемĕ» наци культурин фестивалĕн çĕнтерÿçисем республика шайĕнче ирттернĕ конкурса хутшăчĕç. Çатракасси шкулĕнче 9 класра вĕренекен Димитриева Надежда «Шевле - 2012» Раççей историйĕн çулталăкне халалланă ÿнер ăсталăхĕн конкурсĕнче 3 вырăн йышăнчĕ.

Çак кунсенче И.Я.Яковлевячĕпе хисепленекен Чăваш патшалăх педагогика университечĕн чăваш филологи факультечĕ Раççей историйĕн çулталăкне халалланă «Мĕн-ши вăл тăван çĕршыв» пултарулăх конкурсне пĕтĕмлетрĕ. Конкурса пурĕ 82 çамрăк хутшăннă. Муркаш шкулĕнче 10 класра вĕренекен Козлова Екатерина 2-мĕш, Ефремова Елена – 3-мĕш вырăн йышăнма пултарчĕ.