Хаклă ачасем тата ашшĕ-амăшĕсем!

Сире Пĕтĕм тĕнчери ачасене хÿтĕлемелли кун ячĕпе чун-чĕререн саламлатăп.

Ачалăх кашни çыннăн пурнăçĕнче тарăн йĕр хăварать. Малашлăх мĕнле пуласси те çак нихăçан  манăçми пурнăç тапхăрĕнчен нумай килет. Çавăнпа та ача каярахпа пурнăçра хăйĕн вырăнне туптăр тесен, пирĕн, çитĕннисен, хамăртан килнине йăлт тумалла. Ăна мĕн пĕчĕкрен пурнăç илемне курма, кирек епле лару-тăрура та ыррине, лайăх енне суйласа илме хăнăхтармалла. Çакăн пек чухне вăл нимĕнле йывăрлăх умĕнче те çухалса каймĕ. Апла пулсан пирĕн, ашшĕ-амăшĕсен, воспитательсен, вĕрентекенсен вĕсене юратмалла, вĕсем çакна туйччăр тесе тăрăшмалла. Чи малтан хамăрăн вĕсемшĕн ырă тĕслĕх пулса тăмалла.  Вара пирĕн ачасен  пуласлăхĕшĕн те пăшăрханмалла пулмĕ.

Чăваш Республикин, РФ  Правительствисем ачаллă çемьесене пулăшас тĕллевпе нумай ĕç тăваççĕ. Çакă чылай çемьене çăмăллăх парать. Анчах та пирĕн, ашшĕ-амăшĕн,  ачасене хамăршăн çуратнине, вĕсен пуласлăхĕшĕн хамăр яваплине асрах тытмалла.  Вĕсене  ĕçе хăнăхтарса  ÿстермелле, аслисене хисеплеме, яваплăха туйма вĕрентмелле. Атте-анне килĕ вĕсене ĕмĕр тăршшĕпех вăй парса тăтăр тесе халех тăрăшмалла. 

Сывлăхăр пурин те çирĕп, кунçулăр вăрăм пултăр.  Ăнăçу, телей пурнăç çулне сирĕнне те, ачăрсенне те уçсах пытăр. Ĕмĕр тăршшĕпех ачăрсемпе савăнса пурăнмалла пултăр.

 Район администрацийĕн пуçлăхĕ                                      Ю. А. Иванов.